வட இந்திய யாத்திரை - 2

வட இந்திய யாத்திரை 1 ன் தொடர்ச்சி

பஞ்சாப்: ஐந்து நதிகள் ஓடும் மாநிலம். பஞ்ச என்றால் 5. ஆப் என்றால் நீர். சீலம், சீனா, ராவி, பியாஸ், சட்லெஜ் என்பதே இந்த ஐந்து நதிகள். இதில் மூன்று நதிகள் இப்போது பாகிஸ்தானில் இருக்கும் பஞ்சாபில்.  விவசாயம்தான் பிரதானம். சீக்கியர்கள் பூமி, வடக்கே எல்லையோரம் இருக்கும் எல்லா மாநிலங்களிலுமே போராட்டங்கள், உயிரையும் பொருட்படுத்தாமல் மண்ணைக் காக்கும் குணம் இவைகள் பரம்பரை பரம்பரையாக ஆண் பெண் எல்லா குழந்தைகளுக்குமே ஊறி இருக்கிறது. பஞ்சாப், ராஜஸ்தான்காரர்கள் முகலாயர் படையெடுப்புகளை எதிர்ப்பதற்காக கொடுத்த நரபலிகள் லட்சக்கணக்கில் என வரலாறுகள் பறை சாற்றுகின்றன. குழந்தைகளையும் வயதானவர்களையும் கொன்று விடுவது, பெண்களை கெடுத்து விடுவது, குடும்ப உறவுகளை காட்டி பயமுறுத்தி ஆண்களை பலவந்தப்படுத்தி மதம் மாற வேண்டும், இல்லையேல் உயிர், உடைமைகளை விட வேண்டும் என்பதே வாய்ப்பு.

பஞ்சாப் அமிர்தசரஸ்-ஸரஸ் என்றால் குளம், பொய்கை. சீக்கியர்களின் தலைமைப்பீடம் இந்த பொற்கோவில். ஹர்மந்திர் ஸாஹிப், தர்பார் ஸாஹிப் என்று வேறு சில பெயர்கள் இந்தக் கோவிலுக்கு.  அவர்களின் வேத புத்தகமான குருக்ரந்த ஸாஹிப் இருக்கும் பூஜைக்குரிய இடம் இது. சீக்கியர்களுக்கு 1. மறைத்த குடுமி 2. மரத்தாலான சீப்பு, 3. வெள்ளை கச்சம், 4. வாள், 5. இரும்பு கை காப்பு என்ற ஐந்தும் கட்டாய அடையாளங்கள். பரம்பரையாக வந்த 10 குருமார்களின் போதனைகளையும் உள்ளடக்கிய பதினோறாவது குருவாக அவர்களின் வேத புத்தகமான குருக்ரந்த ஸாஹிப் மதிக்கப்படுகிறது. கோதுமை மாவு, நெய், ட்ரை ஃப்ரூட்ஸ், வெல்லம் கலந்த இலவச ப்ரசாதம் வினியோகம் நாள் முழுதும்.  காலை 3 மணிக்கு ஒரு அறையிலிருந்து பொற்கோவில் மூலஸ்தானத்திற்கு இந்த வேத புத்தகம் பல்லக்கில் பவ்யமாக கொண்டு வரப்பட்டு ஒவ்வொரு நாள் பூஜை, வழிபாட்டுக்குப் பின் இரவு 10.30 மணிக்கு மீண்டும் அதே அறைக்குக் கொண்டு செல்லப்படுகிறது. 24 மணி நேரமும் திறந்திருக்கும் பொற்கோவிலின் நான்கு கதவுகள் வழியாகவும் யாத்ரீகர்கள் ஒரு தடையுமின்றி குளத்தைச் சுற்றிலும் ஓய்வெடுக்கிறார்கள்.  24 மணி நேரமும் சப்பாத்தி, தால்(பருப்பு), ஜீரா ரைஸ், டீ ப்ரம்மாண்டமான உணவுக் கூடத்திலிருந்து(லாங்கர்) எண்ணற்ற வாலன்டியர்களால் சமைத்து, பரிமாறப்பட்டு, சுத்தப்படுத்தப்படுகிறது.  நாமும் எதாவது சேவையில் பங்கேற்கலாம்.  உள்ளே நுழையும் போது தட்டு டபரா தந்து அனுப்புவார்கள், தரையிலோ நாற்காலியிலோ அமர்ந்து உண்ணலாம், எவ்வளவு வேண்டுமானாலும், வீணாக்காமல்.

எல்லோரும் அவரவர்கள் நிலையிலிருந்தும், நான் எனது என்ற திமிர் நிலையிலிருந்தும் இறங்கி வழிபடவேண்டும் என்ற புரிதலுக்காக இந்த குளமும், அதன் நடுவில் இருக்கும் பொற்கோவிலும் பூமியின் நிலையிலிருந்து பதினைந்து இருபது அடிகள் தாழ்வில் இருக்கிறது. முன்பெல்லாம் இந்த குளத்து நீரை காலி செய்துவிட்டு, தூய்மை செய்யும் கர சேவக பணி மிகவும் பிரசித்தம். ரவி நதி நீர் இதற்கு மூல நீராக அரசர்கள் காலத்தில் இருந்து வந்துள்ளது, இப்போது நவீன தொழில்நுட்பங்களுடன் இந்தக் குளம் மிகவும் சுத்தமாக பராமரிக்கப்படுகிறது. எந்த உயர்நிலையில் இருக்கும் சீக்கியராக இருந்தாலும் தன் குடும்பத்தோடு இங்கு வந்து சில காலம் எந்த காரியங்களிலாவது தன்னை, குடும்பத்தை ஈடுபடுத்திக் கொள்வதை மிகவும் புண்ணியமாக கருதுகின்றனர். நாமும் கலந்து கொள்ளலாம், தடையில்லை. கோவில் பொற்கோவில் குளத்தில் முழம் நீளத்திற்கு மீன்கள். எவரும் குளிக்கலாம் ஆர்ப்பாட்டமின்றி.  தடுப்பு சங்கிலிகளும்,  பிடித்துக் கொள்ளவும் சங்கிலிகள் பாதுகாப்பிற்கு இருக்கின்றன. எவர் கண்ணிலும் படாமல் குளிக்கவும், உடை மாற்றிக் கொள்ளவும் பெண்களுக்கு குளத்து நீரிலேயே ஆங்காங்கு அறைகள் இருக்கின்றன. அவர்கள் முறைப்படி பெண்களும் ஆண்களும் தலைமுடியை வெளியே தெரியாமல் துணியால் போர்த்தி இருக்க வேண்டும். செல்ஃபி போட்டோ, கம்பீரமாக போஸ் கொடுப்பது தடை செய்யப்பட்டுள்ளது. ஆனால் எல்லாரும் எடுத்துக் கொண்டிருக்கிறோம். ஆங்காங்கு சீக்கியர்கள் பாரம்பரிய உடையில் வாள், ஈட்டியோடு பணியில் இருக்கிறார்கள். மற்றவர்களும் ஆர்வமாக எவரும் தவறு செய்தால் அதை அன்பாக திட்டுகிறார்கள், திருத்துகிறார்கள். நிறுத்துகிறார்கள். கோவிலை சுற்றியும் குளத்தை சுத்தப் படுத்துவதற்காக படகில் சீக்கிய காவலர்கள் உலவுகிறார்கள். 

இங்கிருந்து 16-20 கிலோமீட்டர் தொலைவில் வாகா. பாகிஸ்தான் எல்லை அடாரி உள்ளது. இங்கு தினமும் மாலை இரு நாட்டு ராணுவத்தால் நடத்தப்படும் கலாச்சார கொடியிறக்க நிகழ்ச்சியில் பொதுமக்கள் கலந்து கொள்ளலாம். மிகப் பெரிய நாடு என்பதால் கிரிக்கெட் கிரவுண்டில் இருப்பதுபோல் நம் நாட்டு கேலரி உள்ளது. இருநாட்டு ராணுவ சீருடைகளில் படைவீரர்கள், மூடியிருக்கும் எல்லைக் கதவுகள், மாலை கொடி இறக்கும் நிகழ்வில் கதவுகள் திறக்கப்பட்டு, ஆடல் பாடல் கொண்டாட்டங்களுடன் ஐந்தரை மணி முதல் 6 மணி வரை நடைபெறுகிறது. நம் பகுதியில் மாலை நாலரை மணியிலிருந்தே தேசபக்தி பாடல்கள், உற்சாக முழக்கங்கள் என்று களைகட்டி விடுகிறது. குளிர்ந்த குடிநீர், ஐஸ்கிரீம், தின்பண்டங்கள் சர்க்கஸ் கொட்டகை போல் கிடைக்கின்றன. பொம்மைகள் நினைவுச் சின்னங்கள் கிடைக்கின்றன. எல்லை கதவுக்கு அருகில், படைவீரர்களுக்கு நடுவில் நின்று போட்டோ எடுத்துக் கொள்ளலாம். நம் பரம்பரைக்கு ஒரு பெருமையான நிகழ்வு இது. இங்கு கட்டுப்பாடுகள், அணிவகுப்புகள் முக்கியம் இல்லை. கலாச்சாரம், கொண்டாட்டமே முக்கியமாக உற்சாகப்படுத்தப்படுகிறது. 

ராமனின் வாரிசான லவன் குசன் இருவரில் லவனின் தலைநகரமான லாகூர் லாகூர் இங்கிருந்து 22 கிலோ மீட்டர் தொலைவுதான்.  பொசுக்கும் வெயிலில் ஒரு காலணியை கால்களுக்கும், மற்றொன்றை அமர்ந்து கொள்ளவும் இருக்கையாக்கி துண்டை போர்த்திக் கொண்டு 3 மணியிலிருந்து மாலை ஆறரை மணி வரை அங்கே அனுபவித்தோம்.  ஆட்டோ அமர்த்திக்கொண்டு சென்றோம் போகவர ஆயிரம் ரூபாய்.  தனியாக ஆட்டோவில் சென்றால் இஸ்கான் கோவில், வால்மீகி ஆசிரமம், குழந்தைகளுக்கான வைஷ்ணவி தேவி கோவில் இவைகளையும் தரிசித்து வந்துவிடலாம்.  வால்மீகி ஆசிரமம் நிம்மதியாகவும் பிரம்மாண்டமாகவும் பெரும் குளத்தோடும் இருக்கிறது. லவனும் குசனும் பிறந்து, குருகுலவாசம் இருந்து ராமாயணம் கற்றார்கள் என்று கூறுகிறார்கள்.  

துர்க்கியானா (துர்க்கை) மந்திரும் பொற்கோவிலே.  அதைப்போன்றே அமைப்பு. 2-3 நாட்கள் தங்கினால் இந்த பொற்கோவில், கோவில் ம்யூசியம், பார்டிஷன் ம்யூசியம், வாகா பார்டர், ஜாலியன்வாலா பாக், வால்மீகி ஆஶ்ரமம், துர்க்யானா டெம்ப்பிள், கண்ணாடி ஓவியங்கள், செயற்கை குகை, அருவி, ஓடைகள் அமைந்த லால் தேவி (வைஷ்ணவி) கோவில் என நிம்மதியாக பார்க்கலாம்.

எல்லா ஊர்க்காரர்கள் போலவும் ஏமாந்தால் ஏமாற்றுகிறார்கள். பொருள்கள் பத்திரம்.  கடின உழைப்பாளிகள்.  பாரதத்திலிருந்து பாகிஸ்தான் பிரிந்த துயரங்கள், பொருள்கள் பார்ட்டிஷன் ம்யூசியத்தில் இருக்கிறது.  திங்கள் கிழமை விடுமுறை.  சர்க்கரை சேர்த்த தயிர்(லஸ்ஸி), நெய் இனிப்புப் பண்டங்கள் இங்கு பிரபலம். இங்கிருந்து டெல்லி ரயில்வே ஸ்டேஷன் (NDLS) 8 முதல் 10 மணி நேர ரயில் பயணம்.